O  concello de Guntín de Pallares, igual que outros moitos concellos galegos, conta entre os seus habitantes con xentes que coñecen á perfección oficios tan antigos e á vez tan nosos como poden ser o de ferreiro, canteiro, zoqueiro, cesteiro e outros moitos. Estes saberes perduran na mente e na habilidade destas xentes que aínda hoxe conservan os aparellos necesarios e propios de cada un destes oficios e que son quen de desempeñalo tal e como o facían hai anos.
Guntín é un concello polo que discorren un gran número de rios e de regatos, entre os que destacan o río Ferreira e, como non, o río Miño. Son, xa que logo, un elemento de importancia vital que van influír dun modo  decisivo na actividade das xentes que viven preto destes. Ao longo  destes ríos repártense unha infinidade de caneiros construídos co fin de encorar a auga que ía mover as pedras dos muíños, que farían funcionar os  batáns ou que producirían enerxía eléctrica.

O Miño, ao seu paso por este concello, cobra un protagonismo especial. Por unha banda, nel atopamos un gran número de caneiros que no seu día serviron para atrapar especies tan preciadas e cotizadas coma a anguía ou o carangrexo de río, e aínda  que hoxe  a súa función non sexa a de antano, aínda nos queda admirar a súa beleza, o xeito no que se intregran na paisaxe que pasa a ser un elemento máis do contorno no que se sitúa.

As beiras do Miño son especiais posto que nelas, e á altura da Parroquia de San Salvador de Francos, se localizan as augas termo-sulfurosas mencionadas nas táboas de Ptolomeo e posteriormente no Madoz (1847) que as describe como augas medicinais, dada a grande afluencia de xente que a elas acode polas súas propiedades beneficiosas.

O  Miño deixa unha pegada ao longo das parroquias deste concello que se sitúan ás súas beiras ou preto delas, posto que fai que o clima destas parroquias teña unhas características peculiares e diferenciadas coas outras parroquias do concello. É precisamente esta influencia a que vai permitir que proliferen cultivos coma o da vide. Así, nas parroquias de Francos, Piñeiras, Mougán, Navallos, A Mota e Mosteiro podemos ver viñedos dos que se obtén a materia prima necesaria para elaborar uns viños de calidade e, sobre todo, unha augardente que poderiamos cualificar como excelente, como é o caso da de Francos. Métodos de cultivo e técnicas de elaboración transmitidas de xeración en xeración que dan como resultado un produto de alta calidade que merece a pena ser degustado.