Guntín é un concello no que se conxugan á perfección o encanto do mundo rural coas comodidades dunha urbe. Un mundo rural caracterizado polas súas paisaxes, polas súas construcións típicas, polos seus monumentos e lugares cargados de historia e, sobre todo, pola afabilidade das súas xentes que farán que o viaxeiro se sinta como un máis deste concello. Todo isto está acompañado dos servizos que ofrece unha cidade como poden ser supermercados, cafeterías, estacións de servizo, talleres, tendas, farmacias, entidades bancarias, etc.

Se o que buscamos é tranquilidade, podemos optar por un percorrido que se partimos das piscinas municipais e seguimos o paseo fluvial á beira do río Ferreira nos vai levar ata a Ponte Cabalar. O Paseo fluvial ofrece, por un lado, un percorrido sen desniveis no que se pode gozar tanto da beleza do río coma da paisaxe que conforma o contorno onde se enmarca, para despois poñer punto e final na Ponte Cabalar. Se esta ruta nos parece curta, podémola alongar achegándonos ata o Mosteiro de Ferreira de Pallares, lugar de visita obrigada para todo aquel que vén a Guntín. Tanto o exterior coma o interior son sorprendentes e chama a atención o claustro e o mausoleo dos Taboada, entre outras cosas. Na contorna da igrexa encontramos un sepulcro antropomorfo que fai ás veces de pía dunha fonte da que mana unha auga excelente.

Outra das rutas interesantes sería a que segue o camiño primitivo de Santiago ao seu paso por Guntín. Así penetra este concello procedente de Lugo, pola parroquia de San Romao da Retorta, onde ao carón do camiño toparemos coa súa igrexa parroquial, e a uns 150 metros coa réplica dun miliario dedicado a Calígula. Deixando San Romao entramos na parroquia de Santa Cruz da Retorta onde tamén ao lado do camiño poderemos contemplar a igrexa parroquial que baixo a súa aparente sinxeleza se nos presenta como unha verdadeira xoia arquitectónica. O camiño de Santiago deixa Guntín na parroquia de Vilamaior de Negral, para se introducir no concello lindeiro de Palas de Rei.
Igrexas coma as de Entrambasaugas e a de Mosteiro son tamén unha visita obrigada onde o viaxeiro descubrirá tanto nunha coma noutra pinturas murais que decoran o seu interior. Castelos como é o caso do Castelo da Mota, casas señoriais coma a Casa Grande do Vilar son parte dos lugares identificativos deste concello.

Poderemos gozar de fermosas paisaxes coma as que ofrecen as vistas panorámicas do Alto do Picato, ou os frondosos bosques autóctonos localizados por toda a xeografía do municipio entre as que destaca, se cadra, as carballeiras de Santa Euxea. Fermosas paisaxes fluviais atopámolas ao longo do curso do Miño, as insuas da Mota e os Caneiros de Francos son algunhas das mostras representativas destas.

DEPORTE E LECER:

- CENTRO SOCIOCULTURAL, XUVENIL E DA TERCEIRA IDADE

- POLIDEPORTIVO DE GUNTÍN DE PALLARES.

- PISCINAS MUNCIPAIS: destacan polo seu bo estado de conservación e polo contorno no que se enmarcan xa que se sitúan nas beiras tanto do río Ferreira coma do paseo fluvial. Contan con tres piscinas de diferentes tamaños e chama a atención a piscina para bebés.

- ÁREA RECREATIVA DA CARBALLEIRA DE MEIXABOI

É o lugar escollido para a celebración da festa gastronómica do pemento de Mougán. Os carballos centenarios, as mesas de pedra distribuídas pola mesma carballeira e o feito de que se encontre moi preto das piscinas municipais e da estrada de Lugo-Ourense, Lugo-Santiago, preséntana como un lugar ideal para pasar as calorosas tardes do verán.

- CAMPO DE FÚTBOL LADAIRO

- CAMPO DE FÚTBOL DE PARADELA

- CAMPO DE FÚTBOL DE GROLOS

Guntín conta na actualidade con equipos de fútbol que militan en diferentes categorías, xuvenís, veteráns... e equipos de fútbol sala tanto masculino coma feminino. O atletismo é outro dos deportes con grande arraigamento neste concello.